Sepah emissarının Gürcüstanda din adı altında fəaliyyəti

Фото: Yandex.ru

Vidadi Mustafayev

Zəncanlı, üç universitet(İnşaat mühəndisliyi,Mədəni işlər menecerliy və Quran və hədis elmləri sahəsində) bitirmiş,İranın “sayılıb-seçilən” məddahlarından olan 35 yaşlı Mehdi Rəsulinin Gürcüstanın “şiə paytaxtı”(Marneuli) və “şiə mərkəzləri”nə(Qızıl Hacılı və Soğanlıq) 3 günlük (13-15 avqust 2023)səfəri başa çatmışdır.Onun səfəri Sepahın media orqanlarından biri olan “farsnews”saytında xronoloji ardıcıllıqla dokumentalnı-sübutalnı,mətn,fotolar və videoçarxlarla geniş şəkildə işıqlandırılmışdır.

Biz artıq onun iki səfəri haqqında həmin saytın materialları əsasında məlumat vermişik.

Səfərin sonuncu, üçüncü günü haqqında məlumat verməzdən əvvəl sayt haqqında bir-iki söz deməyi lazım bildik.Özünü müstəqil adlandıran  saytın fəaiyyətinin əsas istiqaməti  ictimai-siyasi və mədəni həyatda rejimə yad hesab edilən bütün təzahürlərə(liberalizm,Qərb mədəniyyəti,fərdi mədəni azadlıqlar,etnik hüquqlar və s.) qarşı geniş ideoloji mübarizə aparmaqdır.

Sayt 2009-cu ildə prezident seçkilərində hakimiyyətin seçkinin nəticələrini saxtalaşdırmasına  islahatçı adlandırılan cəbhənin geniş etirazından sonra orta təbəqələrin rejimə qarşı dinc etiraz aksiyalarını   repressiv tədbirlərlə(öldürülünlər və yaralılar) yatıran Sepahın  əməllərini geniş  şəkildə dəstəkləmişdi.

İranda bitməyən inqilabın lideri ayətulla S.Ə.Xameneinin başçılıq etdiyi hakimiyyət həmin il fürsətdən istifadə edərək İslahat cəbhəsinin siyasi partiya və təşkilatlarının fəaliyyətini qadağan etmiş, onların rəhbərləri və fəal üzvlərini həbsə göndərmişdi. Həmin vaxtdan İslahat cəbhəsi ictimai-siyasi həyatdan tamamilə kənarlaşdırılmış və əsasən az-çox ideloji,media fəaliyyətini davam etdirə bilmişdir.

Farsnews saytı  hazırda   islahat cəbhəsinin ideoloji  fəaliyyətinə  qarşı geniş mübarizə aparmağı davam etdirir.

Sayt həmçinin İranda  mülki,vətəndaş hüquqları uğrunda çıxış edən hər kəsə,xüsusən  məşhurlara qarşı amansız ideoloji mübarizə aparır.

Nəhayət saytın ən çox diqqət yetirdiyi sahələrdən bir hicab uğrunda mübarizədir.Sayt elə gün olmaz ki, hicabla bağlı bir neçə material dərc etməsin.Sayt, bütövlükdə mühafizəkar hakimiyyət  kimi hicabı İranda İslam rejiminin ölüm-dirim məsələsi hesab edir.

Mehdi Rəsulinin  Gürcüstana səfərinin üçüncü günü haqqında verilən məlumatda bir sıra yeni məqamlar üzə çıxmışdır.

Biz  səfərin əvvəlki günləri  haqqında verilən məlumatlarda diqqəti Rəsulinin mərasim iştirakçılarına daha çox ağlamağı məsləhət gördüyünə,həmçinin hicabsız qadınlara irad tutaraq onlara çadra  geyinməyi əmr etdiyinə cəlb etməyə çalışmışdıq.Səfərin sonuncu günü haqqında verilən məlumatda artıq  islam inqilabı  ixracı elementlərini görmək olar.

Məlumatda deyilir ki,M.Rəsuli gənclərlə söhbətlərində onları Təziyyə mədəniyyəti ilə yaxından tanış olmağa dəvət edərək,  həmin mərasimi İranda mövcud olan qaydalar əsasında keçirməyin vacibliyini vurğulayıb.

Sayt çəkinmədən yazır ki, M.Rəsuli Gürcüstanın azərbaycanlı gənclərini İslam  bayrağı altında siyasi təşkilatlarda birləşməyə,geniş şəbəkələr yaratmağa çağırıb və bu işlərə  daha çox insan cəlb etməyin vacibliyini vurğulayıb.

Məlumatda qeyd edilməsə də, sepahın məddah nümayəndəsi  gənclərə siyasi İslam təşkilatları yaratdıqları halda İrandan ala biləcəkləri geniş  maddi yardım haqqında danışıb. O,Gürcüstanın şiə təşkilatlarına Zəncandan rəhbərlik ediləcəyinə də işarə edib.Gürcüstan azərbaycanlılarını  1243-cü ərbəin(Kərbəlada hakimiyyət uğrunda öldürülənlərin 1243-cü qırx mərasimi) mərasimində fəal iştiraka və Kərbəlaya səfər  etməyə dəvət edib.O qeyd edib ki, keçmiş və əcnəbi aşiqləri olan zəncanlılar həmin tədbirdə ayrıca komanda ilə iştirak edirlər və gürcüstanlılar da onlara qoşula bilərlər.

Beləliklə, bu üç diplom sahibi Gürcüstanda yalnız dindarları tanımadıqları insanların MİN İL bundan əvvəl baş vermiş faciəsinə ağlatmaqla məşğul olmamış,eyni zamanda çox mühüm bir siyasi missiya yerinə yetirərək,İrana bağlı və gələcəkdə onun maraqlarına xidmət edəcək dini-siyasi bir təşkilatın(bəlkə belə təşkilat çoxdan fəaliyyət göstərir,indi onun yaradılmasından danışılır)əsaını qoymuşdur.

Sepahın missionerləri dindarların dindarlığını gücləndirməklə deyil, onlardan İran rejimi üçün istifadə etmək tapşırığını yerinə yetirməklə məşğul olurlar.

Həmin məsələnin həm Gürcüstanın, həm də Azərbaycanın müvafiq orqanlarının diqqət mərkəzində olmasına,  yəqin ki,ehtiyac vardır.