Kahinəti təğdis kardə bey
- 4-02-2026, 13:59
- РЕЛИГИЯ
- 0
- 179
Foto: churchlifejournal.nd.edu
SİPRİŞON SIXANON
Kahinəti təğdis kardə bey
Bomı kahinəti kardeyro əvoni bı ğaydədə təğdis bıkə. Qıləy beğusurə neqo iyən dıqlə ğoç peqət. Behəmyozə nunon, de zeytunə ruyəni varz doə bıə behəmyozə kukon iyən bəçəy səpe zeytunə ruyən dəsuyə bıə behəmyozə fətiyon hozı bıkə namə qandımə ordədə. Əvoni bınə bə qıləy səvəx. De neqo iyən dıqlə ğoçi ivırədə təğdim bıkə. Çəyo Haruni deçəy zoon biyə bə Vindemonə Çodı dəşəco iyən əvoni de ovi dənşand. Liboson peqət tankard bə Haruni tan cubbə, efodi jitono şəy, efod iyən sinəvanə iyən efodi ğəyşi dəbast bəçəy sinə. Sənə bəçəy sə əmmomə, bə əmmomən mığəddəsəti taci bınə. Ekə məsh kardeyro ruyəni bə Haruni sə iyən əy məsh bıkə. Çəyo çəy zoon biyə iyən tankard bəçəvon tan şəy. Bə Haruni iyən bəçəy zoon miyoni kışti dəbast. Sənə bəçəvon sə əmmomə. Bə zolə ğaydə mıvofiğ kahinəti çəvon bıbu. De jıqoy, Haruni iyən çəy zoon bə kahinəti həsr bıkə.
Çəyo neqo biyə bə Vindemonə Çodı və. Bıdə Harun iyən çəy zoon ıştə dasti bınən bə neqo sə. Neqo Kulli-İxtiyori navədə, Vindemonə Çodı dəşəcoədə obırın. Neqo xunədə peqət, deştə anqıştə dəsu bə ğırbonqo şoxon. Ə mandə xuni isə ekə bə ğırbonqo bınəmi. Həyvoni ləvəruyə piy həmməy, siyociqəri pardə, har dıqlə veki iyən çəy səpenə piy ğırbonqoədə bısut. Neqo qujdi, pusti iyən ruyə nıştəco bentonədə bısut. Im, bo qıno təmiz kardeyro ğırbone.
Qıləy ğoçən peqət, bıdə Harun iyən çəy zoon ıştə daston bınən bə ğoçi sə. Çəyo ğoçi obırın, çəy xuni peşand bə ğırbonqo har tərəfi. Ğoçi pıtı-poə bıkə, çəy ləvəruyə iyən şıvəkon bışışt, bınə çe tikon iyən səy səpe. Ğoçi həmməyəvo ğırbonqoədə bısut. Im, bo Kulli-İxtiyori sutniyə ğırbone, bə Kulli-İxtiyori xoş omə buye, sutniyə edaşte.
Peqət ə qılə ğoçi, Harun iyən çəy zoon daston bınən bəçəy sə. Çəyo ğoçi obırın. Çəy xunədə kamişi peqət bə Haruni rostə quşi mucolə, bəçəy zoon rostə quşi mucolə, bəçəvon rostə daston kəlləanqıştə iyən rostə lınqon kəlləanqıştə dəsu. Ğoçi xuni peşand bə ğırbonqo har tərəfi. Ğırbonqoədə bıə xuno iyən məshə ruyəno peqət bə Haruni iyən bəçəy libosi, bəçəy zoon iyən bəçəvon libosi peşand. De jıqoy, Harun iyən çəy libos, çəy zoon iyən çəvon liboson təğdis bıbun.
Çəyo ğoçi piy, dumi, ləvəruyə edoə piy, siyociqəri səpe piy, har dıqlə veki, çəy səpenə piy iyən rostə şıvəki peqət. Çumçıko ım bo təğdisi bıə ğoçe. Peqət Kulli-İxtiyori navədə bıə behəmyozə nunə səvəxo qıləy behəmyozə nun, de zeytunə ruyəni varz doə bıə nunə kukə iyən qıləy fəti. Imoni həmməy bınə bə Haruni iyən bəçəy zoon dast Kulli-İxtiyori huzurədə oşandın təğdim bıkən. Çəyo ımoni çəvon dasto bıstən ğırbonqoədə sutniyə ğırboni ğəzinə bısut. Im, Kulli-İxtiyori huzurədə xoşbuyə duyəvul, bə Kulli-İxtiyori məğbul bıə edaşte. Haruni təğdisə ğırbon bıə ğoçi sinə qujdi peqət Kulli-İxtiyori huzurədə oşand təğdim bıkə. Im botı baxşəy. Haruni iyən çəy zoon təğdisə ğırbon bıə ğoçi oşandə bıə sinə qujdi iyən şıvəki təğdis bıkə. Im baxşə İsrailıjonku bo Haruni iyən bəçəy zoon zolə baxşə bıbu. Im İsrailıjon bə Kulli-İxtiyori edaştə unsiyətə ğırbonon qıləyniye.
Haruni mığəddəsə liboson çəy bəpeştə bəçəy zoon mandənine. Əvon məsh kardə beədə iyən həsr kardə beədə imoni tankardın. Haruni vırədə kahin bıə zoə ın liboson haft ruj tankardı Vindemonə Çodıədə, Mığəddəsə Otağədə xıdmət kardeyro.
Bo təğdis kardeyro obırniyə bıə ğırbonə ğoçi qujdi peqət, qıləy mığəddəsə vırədə bıqılvon. Bıdə Harun iyən çəy zoon ə ğoçi qujdi iyən səvəxədə bıə nuni peqətın Vindemonə Çodı dəşəcoədə bəhən. Təğdis kardə beyro boştə qınon kəffarə vardə bıə ın təğdimon əncəx əvon bəhən, cokəson harde əzınin, oxo ın hardeyon mığəddəsin. Qirəm təğdisə ğırboni qujdədə iyən nunədə bo maştənə bımando, əvoni bısut, ımoni harde əbıni, oxo mığəddəsin. Az bətı çoknə əmr kardıme, jəqoən bıkə bo Haruni iyən bəçəy zoon. Çəvon həsr karde vaxti haft ruj dəvom bıkə. Har ruj bo ğırboni kəffarə kardeyro qıləy neqo ğırbon biyə. Ğırbonqo pok kardeyro qıləy ğırbon biyə, əy məsh bıkə bo təğdisi. Haft ruji mıddətədə ğırbonqo pok bıkə iyən əy təğdis bıkə. Çəyo ğırbonqo mığəddəs bəbe iyən bəy pexəviyə har çiy mığəddəs bəbe.
Harujnə təğdimon
Har ruj mıntəzəm ğırbonqo səpe dıqlə i sornə pəsəvə biyə. Pəsəvon qıləyni maştəvo, ə qılə isə şanqovəsəy təğdim bıkə. İminə pəsəvə de çoədə i hin zeytunə ruyəni varz doə bıə dadə i efa çokə ordə iyən de çoədə i hin şərovi biyə, şərovi ekə çəvon səpe təğdim bıkə. Şanqovəse təğdim kardə ə qılə pəsəvə bənə maştəvonə, taxıli təğdimi iyən ekardə təğdimi edaşt. Im, bə Kulli-İxtiyori xoş omə xoşbuyə təğdime. Im, boşmə nəsılbənəsıl Vindemonə Çodı dəşəcoədə, Kulli-İxtiyori navədə mıntəzəm sutniyə ğırbon bəbe. Az deşmə əyo vindemon bəkardem, detı sıxan bəkardem. Əyo Az de İsrailıjon vindemon bəkardem, Vindemonə Çodı Deçımı izzəti təğdis bəbe. Az Vindemoni Çodı iyən ğırbonqo təğdis bəkardem, Haruni iyən çəy zoon təğdis bəkardem ki, əvon Bomı kahin bıbun. İsrailıjon arədə səbəso bəbem iyən Az çəvon Xıdo bəbem. Əvonən yodo benıkən ki, Azim Kulli-İxtiyor, çəvon Xıdo. Bekardıme əvon Misiro ki, çəvon arədə səbəso bıbum. Azim Kulli-İxtiyor, çəvon Xıdo!
Bo xoşbuyə xoşbuyə buxur suteyro ğırbonqo
Akasiyə doo ğırbonqo hozı bıkə bo xoşbuyə buxur suteyro. Bıdə əv çoquli formədə bıbu, çəy dırozi i qulac, çəy nıvə i qulac bıbu, əmma bılındi isə dı qulac bıbu, çəy şoxon deəy bitov bıbın. Çəy səpetoni, yanon iyən şoxon de xalisə ğızıli bə ğəlib bıqət iyən bəçəy qırdo-qırdo ğızılə həşiyə bıjən. Boəy dıqlə ğızılə halğə hozı bıkə, ımoni vəbəvə bıə dı tərəfədə həşiyə jiədə dəkırın ki, ğırbonqo kırneədə lokon bəvon pevoniyə bıbu. Lokon akasiyə doo hozı bıkə iyən əvoni de ğızıli bə ğəlib bıqət. In ğırbonqo bınə Əhdi sundoxi vədə bıə pardə vədə, Çımı detı vindemon kardə vırədə, Kəffarə Ğapəği navədə.
Bıdə Harun ğırbonqoədə xoşbuyə buxur bısutı, har ruj maştəvo çoon hozı kardeədə, həmən haşəv çoon suteədə xoşbuyə buxur bısutı. Im boşmə nəsılbənəsıl Kulli-İxtiyori navədə mıntəzəm xoşbuyə buxur təğdim karde ğaydə bıbu. Bı ğırbonqosə co xoşbuyə buxur təğdim məkən, sutniyə ğırbon, taxıli təğdimi, ekardə təğdimiyən təğdim məkən. Sorədə i kərə Harun qınoro kəffarə ğırboni xuni bə ğırbonqo şoxon dəsuyı, əy təğdis bıkə. Nəsılbənəsıl, hasor i kərə jıqo bıkə. In ğırbonqo bo Kulli-İxtiyori ən mığəddəse».
Coni hıriyero doə pul
Kulli-İxtiyori votışe bə Musa: «İsrailıjon bə siyohi sə vaxti har kəs bə Kulli-İxtiyori boştə coni hıriyero pul bıdə ki, bə siyohi sə beədə bəçəy sə bəlo nıvo. Bə siyohi eqıniyə har kəs boştə coniro nimə şekel, yəni şəş ğırəm nığə fidiyə biyə. Im, nimə şekel bə mığəddəsə vırəy şekeli mıvofiğ bıə vist qeraye, Kulli-İxtiyori baxşəy. Vist sinədə bıə iyən çəysə vey sinış bıə bə siyohi eqıniyə har merd ın baxşə bə Killi-İxtiyori doənine. Iştə coni hıriyero Kulli-İxtiyori navədə ərbob nimə şekelisə vey, beçizən nimə şekelisə kam nıdə. Coni hıriyero doə bıə ın puli İsrailıjonku peqət Vindemonə Çodıədə bo ibodəti oko bıdə. Şımə coni kəffarə kardeyro Kulli-İxtiyori navədə bo İsrailıjon xotirə bəbe».
Bırıncə ləqən
Kulli-İxtiyori jıqo votışe bə Musa: «Bo ğusl ekardeyro qıləy bırıncə ləqən hozı bıkə. Bıdə çəy bınəmiən bırıncədə bıbu. Əy bınə Vindemonə Çodı iyən ğırbonqo arədə. Pur bıkə de ovi ki, Harun iyən çəy zoon bışıştın ıştə dast-lınqi. Əvon bə Vindemonə Çodı daxil beədə ğusl ekardəninin, nekneki bəmarden. Xıdmət kardeyro iyən bo Kulli-İxtiyori sutniyə ğırbon vardeyro bə ğırbonqo nez omeədə, şıştəninin ıştə dast-lınqi, nekneki bəmarden. Im, bo Haruni iyən boçəy fərzəndon nəsılbənəsıl zolə ğaydə bıbu».
Bo məsh kardeyro ruyən
Kulli-İxtiyori votışe bə Musa: «Peqət çokə ədviyotonədə: pensa şekel ovinə mirra, çəy nimə ğədərədə dısa penco şekel xoşbuyə dorçin, dısa penco şekel xoşbuyə lenə iyən pensa şekel Çini dorçin, həmən i hin zeytunə ruyən ımon bə mığəddəsə vırəy şekeli mıvofiğ bıbun. Çımonədə bo məsh kardeyro keyfiyətinə xoşbuyə mığəddəsə ruyən hozı bıkə. Bımi məsh kardeyro mığəddəsə ruyən votə bəbe. De həmonə ruyəni ımoni məsh bıkə: Vindemonə Çodı, Əhdi sundoxi, mizi iyən çəy həmə diləqon, çodoni iyən bəy aid bıə çiyon, xoşbuyə buxuri ğırbonqo, sutniyə ğırbononro bıə ğırbonqo iyən çəy həmə diləqon, bırıncə ləqəni iyən çəy bınəmi. De jıqoy, ımoni təğdis bıkə ki, ən mığəddəs bıbun; bəvon pexəviyə har çiy mığəddəs bəbe. Bə Haruni iyən bəçəy zoonən məshi ruyəni dəsuy təğdis bıkə ki, Çımı kahinon bıbun.
Bə İsrailıjon jıqo bıvot: “In curə mığəddəsə məshi ruyən şıməku mandənine, ımi nəsılbənəsıl əncəx Bomı oko bıdən. In ruyən co odəmon andomisə ekardə nıbu. Bəçəy tərkibi oxşər hiç çiy hozı məkən. In ruyən mığəddəse, əy mığəddəs hisob bıkən. Bənə bı ruyəni ruyən hozı kardəkəs, yaan əy co qıləy şəxsi səpe ekardə har kəs xəlği arəo tojniyə bıbu”».
Xoşbuyə buxur
Çəyo Kulli-İxtiyori votışe bə Musa: «Peqət ın xoşbuyə maddonədə: balzam, onika, kasni, xalisə kundur, har çiy eyni mığdorədə bıbu. Imoni umjən bıkə, çımonədə keyfiyətinə xoşbuyə buxur hozı bıkə, bəy nemek bıjən, təmiz iyən mığəddəs bıbu. Çəvədə kamişəy peqət nam bıhor iyən Çımı detı vindemon kardə vırədə Vindemonə Çodıədə Əhdi sundoxi vədə bınə. Im boşmə ən mığəddəs bıbu. Boştə bənə bımi xoşbuyə buxur hozı məkən, bıdə ım bo Kulli-İxtiyori mığəddəs hisob bıbu. Bənə bımi ətır, boştə oko doyro hozı kardəkəs xəlği arəo tojniyə bıbu».
Iradə Məlikova
Dodoqəzeti
