ЕТИМ ЭМИНАН ГУЬМБЕТ ХКАЖАЙ ЮГЪ

   Са рикlел хкун

   Гьар са лезгидин рикlе Етим Эмин ава. A Етим Эмин адахъ галаз санал чlехи хьана, санал рехи жезва. Гьар са лезги дуьньядилай фидайла адан рикlел Етим Эминан цlарар хкведа:

   И дуьнья са фана багъ я,

   Куьне квез гьуьрмет ая тlун.

   Гваз фериди вад юкl агъ я, 

   Шейтlандиз лянет а я тlун.

   Дуьньядин виринра - гьи уьлкведа яшамиш хьунилай аслу тушиз гьар са лезгиди хиялра Етим Эминан гуьмбетни туькlуьрда. Ингье, адан халисан гуьмбет шаирдин l60-йисан юбилейдихъ авсиятда хкажна. Им тахьана заз икьван гурлу, икьван чlехи сувар акурди тушир. 

   l999-йисан 2-июль. Пакамахъ сятдин l0-даз Стlал Сулейманан райондин Эминан хуьруьз (Аламишедин тlвар дегишарна икl эцигнава. Им Е.Эминан хайи хуьр Ялцугъни галаз санал куьчарнавай 7 хуьруькай туькlуьрнавай хуьр я) физвай шегьредин къерехда агъзурралди инсанар кlватl хьанвай. Зуьрнедал ягъизвай лезги макьамри инсанрин руьгь юзурзавай. Лезгийрин милли пекер алукlнавай рушарни гадаяр, кьилел хунчаяр кьунвай дишегьлияр, Магьачкъала, Каспийск, Дагестанские Огни, Дербент шегьеррай, Хив, Кьурагь, Ахцегь, Докъузпара, Рутул, Агъул, Мегьарамдхуьр, Кьасумхуьр районрай атанвай мугьманар вири санал шегьредилай хуьре кьван са километрдин рехъ яхди фена.

   Имни Эминхуьр. Имни Етим Эминан гуьмбет. Ам арадиз гьун патал Дагьустандин халкьдин скульптор Гьейбат Гьейбатова вичин уьмуьрдин l8 йис серфнава.

   Ингье кьасухдай хьиз суалри заз секинвал гузвач. Вучиз чlехи шаирдин гуьмбет Магьачкъалада ваъ, хуьре хкажнавайди я? За гзафбурувай и суалрин жаваб тlалабна, амма садавайни жаваб вугуз хьанач.

   Гуьмбетдин патав жемятди халисан дем кутунвай. Зуьрнедин ванери кlвачерик звер кутазвай. “Лезги газет”дин кьилин редактор Агъариза Саидован, шаирар Фейзуддин Нагьиеван, Эмирмет Чепевидин, Сажиддинан ва масабурун чинра хъвер авай. Гзаф ктабрин автор Абдулбари Магьмудова зун са хзандихъ галаз танишарна: Гъулангерек ва Къагьриман Ибрагьимоврихъ галаз. Гъулангерек шаир я, “Лезги газет”ди Е.Эминаз талукьарнавай поэзиядин конкурсда ада сад лагьай чка кьунва. Къагьриман лагьайтlа, манидар я. Ада вичин сусан гафариз гзаф манияр туькlуьрнава. И хизан Белижда яшамиш жезва.

   “Самур” газетдал рикl алай, адал рикlин сидкьидай дамахзавай къелемэгьли, 8 йисуз Ахцегь райондиз регьбервал гайи Нариман Гьажиева вичин фотоаппаратдив рикlелай тефидай хьтин гьар легьзе тарихдиз элкъуьрзавай.

   Мярекат Дагъустандин Госсоветдин седридин сад лагьай заместитель Багьаддин Агьмедова ачухарна. Ахпа гаф лугьуз кlанзавайбур са-сад микрофондив эгечlна. Рикlер Етим Эминаз муьгьуьббатдив ацlанвай инсанрин гафар куьтягь жезвачир. Гьавадин чимивал 37 градусдилай виниз хкаж хьанвайтlани, агъзурралди инсанри ал ракъиник, я са хъен авачир, я са пеш юзазвачир гъенел акъвазна сятралди халкьдин вилик-кьилик квай ксарин гафарихъ яб акалзавай. 

   Азербайжандин лезгийрин тlварцlихъай рахай за шаирдин шиирар хуралай кlелдайла захъ галаз а цlарар гзаф инсанри тикрарзавай. Вичин шаирдал икьван рикl алай жемят акваз бахтлувилин гьиссери зун юзурзавай.

   Мярекат районда – тlебиатдин гуьлуьшан пипlе давам хьана. Тlуьнар-хъунар авай и межлисдал заз тясир авурди ам тир хьи, тост лугьузвай гьар са инсан шаирдикай савадлудаказ рахазвай, адан шиирар хуралай кlелзавай. Чlехи къуллугърал алай ксарини Е.Эминан шиирар тикрарзавай. Халкьдин шаир Ханбиче Ха¬метовади дагъвид рушан кьегьал кьуьл кьилиз акъудайла, Мегьарамадхуьруьн райондин чlехидан за¬меститель Натальяди “Синьорина” мани лагьайла, Дагъустандин кьилин прокурор Имам Яралиева Е.Эминан поэзиядин тикрарсузвиликай рахайла, Стlал Сулейманан райондин кьил Гьамидэфенди Межведдинова шаирдин поэзиядин кьетенвилерикай ихтилатдайла абурун руьгьдал гьейран хьанай зун.

   Заз Эмин вични чахъ галаз санал мярекатда авай хьиз хьанай. Адан руьгь чи межлисдин кьилелай элкъезвай хьиз жезвай. Масакlа хьун мумкин тушир. Халисан шаирар рекьизвайди туш, абур руьгьер хьиз чпин хайи чилел хквезвайди я, лугьуз фикирзавай за. Жуван уьмуьрдин юлдашдихъ галаз санал руьгь ацlанваз, луварар акатнаваз хтанай чун Дагъустандай Азербайжандиз.