Седакъет Керимова : СА ХАХАДИЗ
- 3-04-2026, 10:53
- КУЛЬТУРА
- 0
- 380
Седакъет Керимова
Пагьливандин ухшар авай
Са кас чида заз, дустар.
Рех ягъана, яшар хьанвай,
Ам фигъилрин я устIар.
Зун акурла кьве къат хьана,
Икрам ийиз рахада.
Зи гуьгъуьна ягьанатиз,
Айгьамарда явада.
Герен-герен жуванбурал
«Кьил чIугвада» миресди.
Мез-гъвел ийиз вичин саягъ,
Гаф хкудда сересдиз.
Зи крарихъ рехне кутаз,
Ам къапарай акъатда.
«Рахаз тахьуй адав» лугьуз,
Кагьулривни агатда.
Тавур крар илитIиз зал,
Жеда а кас гьавалат.
Низ акур тир ихьтин ламатI,
И жуьредин аламат?
Лугьуда хьи, зи кар «шиир
кхьиз, виле сухун я.
Межлисрал, алаз-алачиз
Дидед чIалал рахун я.
Вучда «Самур» газетдикай?
Ам кIевирун герек я.
Вучда адан манийрикай?
Чаз кIанзавайд эрекь я!»
ТIуьн-хъун гана захавилив,
Агудда икI къанатIар.
Са дишегьли виляй вегьиз,
КIватIда чIехи къуватар.
Эллериз чав чукIуриз ам,
Ава кьарай атIана.
Пехилвили алугайди
Пехъи жеда датIана.
Илгьамдикай пай авачир,
Къелемдивай яргъалди,
Вучиз икьван ягьсуз ятIа,
Вучиз икьван ягъалди?
Вичиз итим лугьузвайда
Вечре хьиз чил чалзава.
Хайибурун ара ягъаз,
Усалвилихъ ялзава.
Ава ам икI, гьалчиз къванер
Са мег рехи дидедал.
КIан хьайила илитI жеда
ЧIулав рангни живедал.
Буйругъ кьилиз акъудзава
Ада чIехи хахадин,
Кьилиз акьул мус къветIада
И кьам яцIу «дахадин»?
