İki iranlı-israilli ekspert: Bəndər-Rəcai partlayışları İran rejimini ciddi şəkildə zəiflətdi
Foto: flagman-news.ru
Təqdim etdi: Səməd Bayramzadə
27.04.2025
Nasir Etemadi - Radio “France International”
İsrailin Milli Təhlükəsizlik Araşdırmaları İnstitutunun İran məsələləri üzrə eksperti Ben Sabti “Mario” qəzetinə müsahibəsində Bəndər Abbas partlayışlarının İran rejimini ciddi şəkildə zəiflətdiyini bildirib. O, Bəndər Rəcainin rolunu İran hökumətinin yaşaması üçün vacib adlandırıb və deyib: “Rəcai limanının əhəmiyyəti təkcə onun İslam Respublikasının ən mühüm və ən böyük ticarət limanı hesab edilməsində deyil, eyni zamanda bu liman vasitəsilə İran İslam İnqilabı Keşikçiləri Korpusu (SEPAH) Hizbullah və Husilər üçün silah və hərbi texnika, eləcə də qaçaqmalçılıq yolu ilə neftin Çinə daşınması üçün istifadə edir.
Ben Sabti daha sonra deyib: “İran rejiminə yaxın olanlar adətən belə hadisələri İsrailə aid etsələr də, İslam rejiminin özü belə mövqelərdən rəsmən çəkinir. Çünki o, bunu hazırda öz maraqlarına uyğun görmür”
Sabti yekunlaşdıraraq bildirib ki, Bəndər Abbasın infrastrukturuna ciddi ziyan dəyərsə, İnqilab Keşikçiləri neft və qaçaq silahların ixracında, İslam Dövləti isə həyati əhəmiyyətli malların idxalında çətinliklərlə üzləşəcək.
Digər iranlı-israilli tədqiqatçı Meir Cavidanfər “Mario”ya deyib ki, Rəcai limanında partlayan kimyəvi birləşmə - natrium perxlorat Çindən gətirilib və İnqilab Keşikçiləri Korpusunun (SEPAH) ballistik raketləri üçün bərk yanacaq hazırlamaq üçün istifadə olunmalı idi. O, həmçinin Bəndər Abbas partlayışlarının səbəbinin daxildən olduğunu bildirib və İslam rejimini ölkəni idarə etməkdə uğursuzluqla xarakterizə edib.
Cavidanfər birmənalı olaraq üçüncü ölkənin - ABŞ və ya İsrailin bu partlayışda iştirakını qəbul etmir. Çünki onun sözlərinə görə, hazırda ABŞ və İran danışıqlar aparır və Trampın İran rejimi ilə razılığa gəlib-gəlməyəcəyini bilməsi vacibdir. Cavidanfər daha sonra əlavə edib ki, İsrail hökuməti Baydendən daha çox Tramp administrasiyasından qorxur və hazırda Trampın mövqeyini zəiflədəcək heç bir addım atmır.
