Bəndər Abbasdakı partlayışların mənşəyi: “New York Times”-ın xəbəri və İran Müdafiə Nazirliyinin bəyanatı

Foto: www.accuweather.com

Təqdim etdi: Səməd Bayramzadə

New York Times: Bəndər Abbas partlayışlarının mənbəyi İran İslam Keşikçiləri Korpusunun (SEPAH) ballistik raket yanacağı olub

İnqilab Keşikçiləri Korpusuna yaxın mənbə “New York Times” qəzetinə bildirib ki, İranın ən mühüm ticarət limanı olan Bəndər Abbasda baş verən partlayışlar “natrium perxlorat” (Sodium perchlorate) kimyəvi birləşməsinin daşınması və saxlanmasında ehtiyatsızlıq nəticəsində baş verib. Həmin materialdan SEPAH-ın ballistik raketləri üçün bərk yanacaq hazırlamaq üçün istifadə olunur. Bundan əvvəl “Associated Press” agentliyi “Embry Marine Security Company”-yə istinadən məlumat vermişdi ki, Bəndər Abbasda dünənki partlayışlara səbəb İnqilab Keşikçiləri Korpusunun ballistik raketləri üçün bərk yanacaq yüklərinin saxlanmasında ehtiyatsızlıq olub. Bununla belə, bəzi havadan çəkilmiş görüntülər partlayışlarda təxribat olduğuna dair şübhələr yaradır.

“Əl-Cəzirə”-nin İrandakı müxbiri də Bəndər Abbasdakı bu partlayışı 2020-ci ilin avqustunda Beyrut limanında baş verən partlayışla müqayisə etmişdir. O vaxt Livanın yüksək səviyyəli liderləri Hizbullahın tam nəzarəti altında olan Beyrut Limanında baş verən partlayışın Quds tərəfindən minlərlə ton natrium perxloratın qeyri-qanuni saxlanması nəticəsində baş verdiyini bəyan etmişdilər.

Bununla belə, bəzi havadan görüntülər Bəndər Abbas partlayışlarının üç ayrı yerdə baş verdiyini göstərir ki, bu da partlayışların təxribat nəticəsində törədildiyi şübhəsini gücləndirir.

İranın Müdafiə Nazirliyi Bəndər Abbasda baş verən partlayışları hərbi yüklərlə əlaqəsi olmayan adlandırır

İran İslam Respublikasının Müdafiə Nazirliyi Şəhid Rəcai limanında şənbə günü (26.04.2025) partlayışlara səbəb olan hər hansı hərbi yükün mövcudluğunu təkzib edən bəyanat yayıb və bununla bağlı bəzi xəbərlərin dərcini “düşmənlərin psixoloji əməliyyatları” və “xarici medianın əməlləri” adlandırıb.

İslam Respublikası Müdafiə Nazirliyinin sözçüsü bildirib ki, rəsmilər, ölkənin Böhran Vəziyyətlərində İdarəetmə Təşkilatı və Daxili İşlər Nazirliyi Bəndər Abbasda dünənki partlayışların "əsas və ikinci dərəcəli səbəblərini" "uyğun zamanda" elan edəcəklər. O, ictimaiyyəti əmin etmişdir ki, "hadisə bölgəsində və bütün Şəhid Rəcai Limanında [ballistik raket üçün] yanacaq və ya hərbi istifadə üçün idxal və ya ixrac edilən yüklər yoxdur".

İslam Respublikası hökumətinin sözçüsü Fatimə Mühacirani ayrı-ayrı bəyanatlarında Bəndər Abbasda baş verən partlayışları "qəza" adlandırıb və bildirib ki, onlardan sonra hökumət bazar ertəsi gününü ölkə boyu milli matəm günü elan edib.

Mənbə: https://news.gooya.com/2025/04/post-97490.php 

27.04.2025