İran-ABŞ danışıqlarının üçüncü raundu Maskatda başa çatıb; Tehran danışıqların ciddiliyini vurğulayır

Foto: AA

Təqdim etdi: Səməd Bayramzadə

27.04.2025

ABŞ və İran arasında danışıqların üçüncü raundu dünən, şənbə, aprelin 26-da Omanın xarici işlər nazirinin vasitəçiliyi ilə Maskatda keçirilib. Danışıqların bu raunduna İranın xarici işlər naziri Abbas Araqçi və ABŞ prezidentinin Yaxın Şərq üzrə xüsusi nümayəndəsi Stiv Vitkaf sədrlik edib.

Rəsmi mənbələrə görə, danışıqların bu raundunda siyasi görüşlərlə yanaşı, texniki və ekspert müzakirələri də aparılıb. Danışıqlarda İran Xarici İşlər nazirinin siyasi məsələlər üzrə müavini Məcid Təxt Rəvançi və Xarici İşlər nazirinin hüquq və beynəlxalq məsələlər üzrə müavini Kazım Qəribabadi başda olmaqla iranlı ekspert qrupu iştirak edib. Amerikalı ekspertlər qrupuna Maykl Anton başçılıq etmişdir.

İran Xarici İşlər Nazirliyinin sözçüsü İsmail Bəqai, əvvəlki raundlarda olduğu kimi, danışıqların Oman tərəfindən idarə olunduğunu və ayrı-ayrı otaqlarda keçirildiyini açıqlayıb. O bildirb ki, İranın ekspertlər qrupuna sanksiyalar, iqtisadi-bank məsələləri, nüvə proqramı və Beynəlxalq Atom Enerjisi Agentliyi ilə bağlı məsələlər üzrə mütəxəssislər daxildir.

Bəqai həmçinin vurğulayıb ki, İran sanksiyaların dayandırılması zərurətinə sadiqdir və nüvə proqramının dinc xarakter daşıması ilə bağlı inam yaratmağa hazırdır.

Danışıqların bu raundu başa çatdıqdan sonra Omanın xarici işlər naziri qısa bir bəyanatda bildirib ki, bu raundda aparılan danışıqlar Birləşmiş Ştatlar və İranın qarşılıqlı hörmət və uzunmüddətli öhdəliklərə əsaslanan razılaşma əldə etmək istəyini əks etdirir və danışıqlarda əsas prinsiplər, məqsədlər və texniki narahatlıqlar nəzərə alınıb.

Danışıqların üçüncü raundu başa çatdıqdan sonra İranın Xarici İşlər naziri Abbas Əraqçi danışıqlar mühitinin ciddi və işlək olduğunu, prosesdən və sürətdən razı qaldığını açıqlayıb. O, əlavə edib ki, danışıqların nəticəsi ilə bağlı ümidlidir, lakin ehtiyatla davam edir.

Əraqçi daha sonra bildirib: Qarşı tərəfin iradəsi görünür, lakin bu, bütün fikir ayrılıqlarının həll edildiyi anlamına gəlmir. Onun sözlərinə görə, danışıqlar ümumilikdən konkret məsələlərə keçib və danışıqlar yalnız nüvə məsələlərinə və sanksiyaların ləğvinə yönəlib. Əraqçi danışıqların növbəti raundunun gələn şənbə günü keçirilməsinin mümkünlüyünü də açıqlayıb.

Mənbə: https://trt.global/farsi/article/1e679f09247a