KİBALİON - MİSİR VƏ YUNAN HERMETİK FƏLSƏFƏSİ: ÜÇ TƏŞƏBBÜS

Foto: google

“Hər şey ikilidir (dual):  hər şey iki qütbə malikdir, hər şeyin öz əks tayı vardır; bənzəyən və bənzəməyən eynidir; əksliklərin təbiəti birdir, dərəcələri fərqlidir; uclar qovuşurlar; bütün həqiqətlər yarımçıq  həqiqətlərdir; bütün paradokslar uzlaşdırıla bilər.”

Dördüncü Uca Hermetik Prinsip - Qütblülük Prinsipi: təzahür edən hər şeyin, “iki tərəfi”, “iki cəhəti”, “iki qütbü”, “bir əks cütü” olması və ən uclar (əks qütblər) arasında müxtəlif dərəcələrin olması gerçəyini təsvir edir.

İnsan şüurunu çaşqınlığa sürükləyən köhnə paradokslar bu prinsip sayəsində həllini tapır. İnsan bu prinsipə bənzər bir şeyin varlığından şübhələnərək və aşağıdakı kimi deyimlər, aforizmalar ilə bunu izah etməyə çalışmışdır: “Hər şey eyni anda həm vardır, həm yoxdur”, “bütün doğrular yarımçıq doğrudur”, “hər həqiqət yarı həqiqətdir”, “hər şeyin iki tərəfi vardır”, “hər medalyonun bir arxa üzü vardır” v.s.

Hermetik təlimlərə görə üzdə daban-dabana əks kimi görünən şeylər arasında sadəcə dərəcə fərqi vardır. Hermetik təlim öyrədir ki, “uclar və əkslər uzlaşdırıla bilər”, “tezislə antitez təbiətcə birdir, fəqət dərəcə baxımından fərqlidir” və Qütüblülük Prinipinin tanınmasıyla "əkslərin universal (evrənsəl) uzlaşmasına nail olmaq olar".

Ustadlar bu prinsipin nümunələrini hər kəsin görə biləcəyini və bunu üçün təbiətə nəzər salmağın kifayət etdiyini deyirlər. İlk olaraq onlar Materiya və Ruhun eyni şeyin iki qütbü olduğunu, aralıq müstəvilərin isə yalnız vibrasiya (enerji dalğalanması) sıxlığı ilə bir-birindən ayrıldığını öyrədirlər. Onlar göstərirlər ki, BÜTÜN və ÇOXLUQ eyni şeydir, fərq, sadəcə Əqli Təzahür məsələsidir.  QANUN və QANUNLAR da, eynilə, eyni şeyin əks tərəfləridir. Həmçinin,  PRİNSİP və PRİNSİPLƏR, Mütləq Ağıl və Xüsusi Ağıl da eynidir. 

Fiziki müstəvidə isə onlar isti və soyuğun təbiətcə eyni olması, sadəcə dərəcə baxımından fərqlənməsi prinsipini misal gətirirlər. Termometr bir çox fərqli istilik dərəcələrini göstərir, isti ucu yuxarıda,  soyuq ucu isə aşağıdadır. Bu ən son uc dərəcələr arasında müxtəlif dərəcədə isti və soyuqluq var, siz bu dərəcələrdən hər hansı birini isti və ya soyuq adlandıra bilərsiniz və yanılmazsınız. Üst həmişə "isti", alt həmişə "daha soyuq" olur.

Şərqə doğru səyahət edin, başladığınız yerdən qərbə, qərbdən isə indiki nöqtəyə (şərqə) çatacaqsınız. Kifayət qədər şimala gedin və özünüzü cənubda görəcəksiniz. İşıq və Qaranlıq da eyni şeyin qütbləridir, aralarındakı fərq, yalnız dərəcə fərqidir. Musiqi notları da eynidir. Siz "Do" ilə başlayırsınız və yuxarı qalxdıqca başqa bir "Do" ilə qarşılaşırsınız və s. Eyni şey rənglərə də aiddir. Yüksək bənövşəyi və yüksək qırmızı arasındakı yeganə fərq yüksək və aşağı vibrasiyadır. Böyük və kiçik nisbidir. Müsbət və mənfi aralarında saysız-hesabsız dərəcələr olan eyni şeyin iki qütbüdür. O cümlədən, Xeyir və Şər də mütləq deyil, biz bir uca Xeyir, digər uca isə Şər deyirik. Yaxud hadisənin bir ucuna Xeyir, digər ucuna Şər deyirik. Bir şey dəyər baxımından daha yüksək olan bir şeydən daha az yaxşıdır, lakin onun altındakı bir şeydən "daha yaxşı".. Daha yaxşı və daha pis ifadələri dərəcə fərqini göstərir. 

Eyni şey şüuri düzənə də aiddir. Məsələn, sevgi və nifrət əksər insanlar tərəfindən bir-birinə daban-dabana zidd, barışmaz hisslər olaraq qəbul edilir. Ancaq Qütb Prinsipini tətbiq etdikdə bir-birindən qəti cizgilərlə ayırd edilmiş Mütləq Sevgi və ya Mütləq Nifrət kimi bir anlayışın olmadığını başa düşərik. Bu iki şey eyni şeyin iki qütbünə verilən fərqli adlardan başqa bir şey deyil. Bir ucdan digərinə keçərkən bir yerdə “daha çox nifrət və ya daha az sevgi”, digər bir yerdə isə “daha az nifrət və ya daha çox sevgi” tapırıq. Sevgi və nifrətin dərəcələri vardır və onların arasında bəyənmə və ya bəyənməmə kimi ifadə edilən elə ara nöqtələr var ki, ikisi arasındakı cizgi o qədər qeyri-müəyyənləşir ki, bir-birindən ayırd edilməyən hala gəlirlər. Cəsarət və qorxu da eyni qaydaya tabedir. Qütblər hər yerdə mövcuddur. Harada bir şey tapırıqsa, eyni zamanda onun əksini və ya hər iki əks ucunu da tapırıq.

Məhz Hermetistlərin qütbləşmənin köməyi ilə bir psixi vəziyyətdən digərinə keçə bilməsi bu fenomenal hal sayəsində mümkün olur. Ancaq burda xüsusi bir məqam vardır ki, müxtəlif siniflərə aid olan şeylər bir-birinə çevrilə bilməz, yalnız eyni sinfə aid olan şeylər bir-birinə çevrilə bilər və onlar geri çevrilərək qütblərini dəyişdirər. Beləliklə, sevgi heç vaxt şərq və ya qərb, ya da qırmızı və ya bənövşəyi ola bilməz, lakin çox vaxt nifrətə çevrilir. Nifrət də eyni şəkildə qütbünü dəyişərək sevgiyə çevirə bilər. Cəsarət qorxuya və ya əksinə qorxu cəsarətə çevrilə bilər. Sərt şeyləri yumşaq etmək olar. Kəskin şeylər kütləşdirilə bilər. İsti şeylər soyuyar. 

Bu belə davam edər, transformasiya,  yalnız eyni növdən olub dərəcə baxımından fərqlənən  şeylər arasında mümkündür. Qorxaq bir insanı misal çəkək. Zehni vibrasiyasını yüksəltməklə, bu insan ən yüksək cəsarət və ya qorxusuzluqla doldurula bilər. Həmçinin, passiv insan özünü aktiv, canlı fərdə çevirə bilər.  

Bunun üçün istənilən keyfiyyətin iki uc nöqtəsi arasında qütbləşməsi kifayətdir.

Bir çox psixologiya məktəbi öz təlimlərinə əməl edən düşüncə tərzinə malikdir. Vəziyyətlərində dəyişiklik edə biləcəklərini bilən tələbələr bu dəyişikliklərin altında yatan prinsipi dərhal dərk edə bilməzlər. Qütblülük Prinsipini qavradıqdan və psixi dəyişikliklərin eyni xəttdə iki qütb arasında dəyişikliklər olduğunu gördükdən sonra məsələ daha asan başa düşülür.

Beləliklə, dəyişiklik bir-birindən tamamilə fərqli iki şey arasında baş verməmişdir, sadəcə olaraq eyni şey daxilində dərəcə fərqi olmuşdur. Bunu anlamaq və bilmək çox vacibdir. Fiziki müstəvi üçün bir nümunə versək,  istiliyi kəskinliyə, gurultuya, hündürlüyə v.s çevirmək mümkün deyil. Ancaq isti asanlıqla soyuğa çevrilə bilər; burada edilməsi lazım gələn tək şey vibrasiyanı azaltmaqdır. Eyni şəkildə, Sevgi və Nifrət, Qorxu və Cəsarət də bir-birinə çevrilə bilən şeylərdir. Psixi vəziyyətlər saysız-hesabsız siniflərə bölünür, hər bir sinif öz əks qütbünə malikdir və qütblər arasında transformasiya mümkündür.

Beləliklə, tələbə zehni planda da, fiziki müstəvidə də əks qütblərin müsbət və mənfi adlandırıldığını asanlıqla görür. Sevgi nifrətlə müqayisədə pozitivdir, yəni müsbətdir. Cəsarət nifrətdən, fəaliyyət passivlikdən pozitivdir. Hətta Vibrasiya Prinsipini bilməyənlər belə, müsbət qütbün mənfi qütbdən daha yüksək dərəcəyə malik olub digərinə hakim olduğunu asanlıqla görə bilirlər. Ümumiyyətlə, təbiətin meyli müsbət qütbün dominant fəaliyyətinə istiqamətlidir. 

Bir insanın Qütbləşmə sənətindən istifadə edərək öz psixi vəziyyətinin qütblülüyünü dəyişdirməklə  yanaşı, Psixi Təsir Fenomeni ilə bizə bu prinsipin genişləndirilə biləcəyini və onun təsirinin başqa bir insanın zehninə qədər çatdırıla biləcəyini də göstərir. Son illərdə bu mövzuda çox yazılıb və öyrədilib. 

Psixi induksiyanın mümkün olduğu, yəni başqa bir şəxsdə psixi induksiya yolu ilə  psixi halların yaranmasının mümkünlüyü qəbul edilirsə, onda müəyyən vibrasiya sürəti və ya psixi vəziyyətin müəyyən bir qütbləşməsi yolu ilə başqa bir insana necə ötürüləcəyi və onun qütbünün və ya psixi vəziyyətinin necə dəyişdirilə biləcəyini asanlıqla görmək olar. Bir çox psixi müalicəni mümkün edən də budur. Tutaq ki, insan “mavi”dir; qorxu və melanxolika ilə doludur. Bir psixoloq öz ağlının iradəsiylə özünü istədiyi vibrasiyaya gətirir və hal üçün tələb olunan lazımi qütbləşməni əldə edir, sonra induksiya yolu ilə digərində də oxşar ruh halı yaradır.  Nəticədə titrəşimlər (enerji dalğalanması) artır və insan mənfi qütbə getmək əvəzinə müsbət qütbə doğru hərəkət edir və nəticədə qorxu və digər mənfi duyğuları cəsarətə və bu kimi oxşar müsbət psixi vəziyyətlərə çevririr. Kiçik bir araşdırma bu psixi halların hər zaman qütbləşdirmə yoluyla reallaşdığını göstərəcəkdir, dəyişim növlülükdən daha çox dərəcə baxımındandır. 

Bu dərin Hermetik Prinsipin varlığını bilmək tələbəyə özünün və başqalarının psixi vəziyyətini daha asan başa düşməyə imkan verir. O, bu ruh hallarının, yalnız dərəcə fərqi olduğunu görə bilir. Tələbə titrəşimini öz iradəsi ilə dəyişdirməyi öyrənərək psixi durumlarının köləsi və ya aləti deyil, ağası olur. O, bu bilik sayəsində ağlından istifadə edərək dostlarına kömək edə bilir. Müvafiq üsullarla qütbü dəyişdirərək istənilən vəziyyətə keçə bilir.

Biz tələbələri bu Qütblülük Prinsipini daha dərindən öyrənməyə və başa düşməyə çağırırıq, çünki sözügedən prinsipin düzgün qavranılması bir çox çətin məsələlərə aydınlıq gətirəcəkdir.