İSLAM İNQİLABI, SONRA NƏ
Foto:google
Vidadi Mustafayev
Artıq neçə vaxtdır iranlıların bir çoxu belə hesab edir ki, İranda İslam inqilabı, deyəsən digər ideoloji pərdə altında davam etmiş inqilablar kimi, özünü doğrultmadı. Amma onlar yanılırlar, çünki Amerika səfirliyini tutandan(4 noyabr 1979) sonra referondumda yekdilliklə, hurra ilə qəbul olunmuş Əsas qanunda yazılır ki, kapitalizm və sosializmdən fərqli olaraq inqilabın məqsədi insanların maddi tələbatını hərtərəfli ödəmək yox, insanın allaha tərəf hərəkətini asanlaşdırmaq və təmin etməkdir.Həmin məsələdə iqtisadiyyat məqsəd yox, vasitədir.
Hayıf ki, iranlılar bu ali məqsədi düzgün dərk etməyərək işsizlik, aşağı maaş və yoxsulluğa görə dövlətə qarşı etirazlar edirlər. Axı iqtisadi tələbat nə qədər az ödənsə, allaha gedən yol da o qədər hamar olar. Bu ali məqsədi nəinki adi adamlar, deyəsən, incəsənət xadimləri də düzgün başa düşməyirlər. Bu günlərdə onların böyük bir dəstəsi hər il fevral ayının 1-dən 11-nə kimi davam edən FƏCR beynəlxalq teatr festivalında iştirak etməkdən imtina edib.
Onlar dövlətin təyyarə qəzası(8 yanvarda Ukrayna sərnişin təyyarəsinn raketlə vurulması) məsələsində xalqa əvvəlcə yalan danışmasına və xalqla bir olmamasına etiraz və ölkə etirazçıları, xüsusən də tələbələrlə, həmrəylik əlaməti oaraq belə qərar qəbul etmişlər.Bu, inqilaba qarşı böyük təhdiddir.
Çünki FƏCR ongünlüyü Xomeyninin İrana qayıtması və İrana yeni ŞƏFƏQ saçması ilə başlayır və inqilabın qələbəsi, şahın devrilməsi ilə başa çatır.Yəni İranda Yeni gün, yeni era başlamış olur.İndi incəsənət xadimləri həmin Şəfəqin doğmasının qeyd edilməsinə etiraz edirlər..Maraqlıdır ki, İslam inqilabı da tələbələrin, ziyalıların, incəsənət xadimlərinin etirazlara başlaması ilə yeni vüsət almış oldu. İndi dünyanı obrazlı şəkildə qavrayıb,obrazlarda təqdim edən incəsənət xadimləri bu etirazları ilə nə demək istəyirlər?\ 14 yanvar 2020
