Şuşa Azərbaycan xalqının milli təfəkkürünü, mədəniyyətini, tarixini özündə təcəssüm edən məkanlardan biridir

Toral Ağayev, Azərbaycanda Katolik Kilsəsinin Apostol Prefekturası

Azərbaycan üçün belə məkanların ən birincilərindən əlbətdə ki Şuşadır. Dinindən və milli mənsubiyyətindən asılı olmayaraq Şuşa hər bir azərbaycanlı üçün əziz və müqəddəsdir. Mədəniyyətimizin beşiyi olan Şuşa 30 il ərzində bizim verdiyimiz itkiləri, xalqımızın acısını təcəssüm edirdi, lakin bu gün Şuşa azaddır və özünə “Azərbaycan mədəniyyətinin paytaxtı” adını qaytararaq əsgərlərimizin qanı və canı bahasına yeni ad qazandı – bu gün Şuşa həm də Azərbaycanın hərbi rəşadətinin  paytaxtıdır. 

Şuşa Azərbaycandır, Azərbaycan isə ürəyi geniş, səxavətli, sülhün və barışın dəyərini bilən, onu sevən hər kəsə qucaq açandır.   Mən əminəm ki, çox vaxt keçməz,  Şuşa bütün dünyada həm də sülhün paytaxtı kimi tanınacaq. 

Dini mənsubiyyətimiz, ibadət ənənənələrimiz fəqli ola bilər, amma bizim hamımızı birləşdirən Azərbaycan var. 44 günlük Vətən Müharibəsindən öncə də  biz dəfələrlə cəmiyyətimizin həmrəyliyindən, ölkəmizdə aparılan siyasət nəticəsində dini və milli barışın və əməkdaşlığın, tolerantlıq və multikulturalizmin yüksək səviyyəsindən danışmışıq, lakin  bu fəzilətlərin həqiqi dəyərini çoxumuz bəlkə də elə vətən müharibəsi zamanı anladıq.  

2020-ci ilin noyabrın 8-zi, cənab prezident Şuşanın azad olma müjdəsini verəndə, koronavirus pandemiyasi başlanandan susmuş Bakının Məryəm Ana katolik kilsəsinin zəngləri bu xəbərin şərəfinə yenidən çalındı.  

2021-ci ilin may ayında isə, Şuşada, Xarı Bülbül festivalı zamanı, Cıdır düzündə görkəmli bəstəkar və pianoçu professor Fərhad Bədəlbəylinin möhtəşəm və kövrək “Dua” əsəri səsləndi. O əsər iki nəfərin  -  müsəlman və xristianın duası üzərində yazılıb və əsərdə xristian duasını katoliklərin ən əziz olan “Ave, Maria” – “Sevin, mübarək Məryəm” duası  təmsil edir. İşğalın və müharibələrin ağrı acısından azad olmuş Şuşada bu əsərin səslənməsi bütün dünyaya sülh mesajı idi. 

Mən Şuşamızı və bütün Azərbaycanımızı müsəlmanlar və xristianlar üçün çox əziz olan Məryəm Ananın dualarına tapşırmaq istərdim. Qoy mübarək Məryəmin dua şəfaəti ilə Uca Yaradan bizim bütün işlərimizi xeyirdualı etsin, Azərbaycana və bütün dünyaya sülh bəxş etsin. Amin  

ZƏFƏR GÜNÜMÜZ MÜBARƏK!