İranda hicabsız və hicablılar haqda əxlaq kodeksi
Foto: iranwire.com
Vidadi Mustafayev
Sepah-ın ruporlarından biri olan “farsnews” saytında bu gün(19.03.1402\09.06.2023) yerləşdirilmiş redaksiya yazısında İranda qadın və qızları yenidən “YERİYƏN TÜRMƏYƏ” qaytarmağın yolları haqqında uzun-uzadı mühakimələr edilir və mülahizələr irəli sürülür.
Yazı müəllifi və ya müəllifləri İranda hicabsızlığın səbəbibini çox sadə bir dəlillə izah, ondan da sadə bir formul ilə ifadə edirlər: hicabsızlığın səbəbi HƏYASIZLIQDIR.
Yəni İran-İslam sivilizasiyası yaradan bir cəmiyyətin bütün hicablı qadın və qızları HƏYALI, hucabsızlar isə HƏYASIZDIRLAR.
Siz təfəkkürün dərinliyinə və ümumiləşdirmənin miqyasına diqqət edin.Bütün İran qadınları və qızları iki yerə bölünür:həyalılar və həyasızlar. Və ya hicablılar və hicabsızlar.Avtomatik olaraq hucablı həyalı, hicabsız isə həyasızlar qrupuna daxil edilir.
Saytda belə də deyilir:”Qızlarımız həyalı olsalar, hicablı da olacaqlar”
Doğrudanmı bu ata, ya ana; bu dayı, ya xala; bu əmi, ya bibi; bu qardaş, ya bacı; bu nənə,ya baba bu qədər savadsız, MƏNƏVİYYATSIZ dır ki, geyim, xüsusən də dəb və ya MODA ilə əxlaq arasında bir başa əlaqə olduğunu iddia edərək xarici görkəminə görə İranın bütün dəblə geyinən və hicaba əməl etməyən qadın və qızlarını, o cümlədən öz yaxın və uzaq qohumlarını, utanmadan, HƏYA etmədən, həyasız adlandırır.
Saytda elə belə də yazılır:”İslam cəmiyyətində yarım boy paltar, önü açıq qısa palto, cırıq şalvar və yaylıqsız saçlar … və belə geyimlə ictimai yerlərdə görünmək hicabsızlıq yox, həyasızlıq əlamətidir”.
Öz mənəviyyatsızlığını bu şəkildə açıq ifadə edən kəs yox, nakəs haqqında hər hansı şərh yazmağa heç bir ehtiyac yoxdur.
Əgər İran İslam cəmiyyətində az-çox ləyaqət və mənəviyyat sahibləri varsa, İranın qız və gəlinlərini çox açıq şəkidə təhqir edən həmin yazıya,onun müəllifinə,sayta və onların arxasında duranlara SƏRT reaksiya göstərəcəklər.Yoxsa ləyaqət və mənəviyyatsızlıqlarını etiraf etmiş olacaqlar.
