Bakı sakinləri qazax mədəniyyəti ilə tanış olurlar
- 16-10-2023, 17:57
- ЭТНОПОЛИТИКА
- 0
- 529
11 oktyabr 2023-cü il tarixində Azərbaycan Milli Xalça Muzeyində Qazaxıstan Respublikasının Mərkəzi Dövlət Muzeyi və Qazaxıstanın Azərbaycandakı Səfirliyi tərəfindən təşkil olunan “Çöl naxışlarının gözəlliyi” etnoqrafik sərgisinə start verilib.
Sərginin açılış mərasimində Qazaxıstanın Azərbaycandakı Səfiri Alim Bayel, Azərbaycan Parlamentinin deputatları, Qazaxıstan Respublikasının Mərkəzi Dövlət Muzeyinin Direktoru Raşida Xaripova, Azərbaycan Milli Xalça Muzeyinin Direktoru Şirin Məlikova, TÜRKSOY-un Muzeylər İttifaqının Baş Koordinatoru Cavid Mövsümlü, diplomatik korpusun nümayəndələri, Azərbaycanda təhsil alan və işləyən qazaxıstanlılar, Bakı sakinləri iştirak ediblər.
Öz çıxışında A.Bayel qeyd edib ki, son ildə Qazaxıstanla Azərbaycan arasında münasibətlər siyasi, iqtisadi, nəqliyyat-logistika, müdafiə sahələrində önəmli dərəcədə intensivləşib. Səfir iki xalq arasında mədəni-humanitar əlaqələrin inkişafının xüsusi rolunu vurğulayıb.
Qazaxıstanın və Azərbaycanın muzeylərinin rəhbərləri R.Xaripova və Ş.Məlikova sərginin konsepsiyası və Türk dünyasının mədəni irsinin qorunması nöqteyi-nəzərdən tədbirin önəmi haqqında söz açıblar. Öz növbəsində, C.Mövsümlü qeyd edib ki, tədbirin TÜRKSOY-un 30 illiyi qeyd olunduğu vaxtda keçirilməsi türk xalqlarının mədəniyyətlərinin yaxınlaşmasına töhfə verir.
Tədbir çərçivəsində Azərbaycan Qədim Musiqi Alətləri Ansamblının çıxışı, Qazax milli rəqsinin nümayişi baş tutub. Sərgi 18 oktyabr 2023-cü il tarixinədək davam edəcək.
Mənbə: Qazaxstanın Azərbaycandakı səfirliyinin mətbuat xidməti.
