İran bizə nə edir?

- Tarixi torpaqlarımızın geri qaytarılması üçün əlverişli zəminin yarandığı bir vaxtda "Sərhədlərin dəyişdirilməsi bizim üçün qəbuledilməzdir" bəyanatını verərək mikoyanlıq edir, yəni vaxtı ilə tarixi ərazilərin vahid dövlətdə birləşməsi təklifinə əngəl yaratmış A. Mikoyanın etdiyini təkrarlayır. Bununla kifayətlənmir, sərhədlərimizdə hərbi təlimlər keçirərək hədə-qorxusunu artırır, "Bizdən hər şey gözləyin! Şirin quyrğu ilə oynamayın!" mesajını verir. Bəli, İran bu gün Zəngəzur dəhlizinin gerçəkləşməməsi üçün əlindən gələni edir və bundan sonra edəcəyi də görünür.

- Ölkədaxili mətbuatda, məscid minbərlərində Azərbaycanı, Azərbaycan dövlətçiliyini, ölkə başçısını təhqir və təhdid edən təbliğat işi aparır, bu dövlətə, bu kimliyə nifrət aşılayan təşviqat siyasəti yürüdür;

- İran siyasi-dini elitası hələ də Azərbaycan kimliyi və dövlətçilik təcrübəsini həzm edə bilmir; bu ölkənin ayrı-ayrı televiziya kanallarında, mətbu orqanlarında "Azərbaycan hakimiyyəti" əvəzinə, "Bakı hakimiyyəti; Bakı rejimi" kimi alçaldıcı və inkaredici ifadələrdən istifadə olunur; 

- Vaxtaşırı olaraq, bu ölkədə Azərbaycanın suveren ərazisi İran imperiyasının tarixi torpaqları kimi göstərilir, ölkəmizə qarşı ərazi iddiası irəli sürülür. İndiki Ermənistan ərazisi sayılan İrəvan xanlığı da, buna qalası olsa, keçmiş imperiyanın bir hissəsi olmuşdur. Maraqlıdır, İranda Ermənistana qarşı əsla ərazi iddiasi səsləndirilmir, deməli, İran siyasi dairələrinin dərdi başqadır...

- İran Azərbaycan dövlətçiliyi əleyhinə addımları həm gizli, həm də açıq şəkildə atır; Ermənistanla qol-boyun olduqdan sonra Azərbaycanla münasibətlərin yaxşılaşdırılması üçün əlindən gələni edəcəyini bildirir, əlbəttə ki, burada ikiüzlülüyü, islam dövlətinə yaraşmayan praqmatik iyrəncliyi görməmək mümkün deyildir...

- Ümumiyyətlə, Azərbaycan respublikasının mövcudluğunu, uğurlarını, mədəni-siyasi genişlənməsini istəməyən bir siyasi təfəkkürlə qarşı-qarşıya gəlmişik. 20 Yanvar faciəsindən sonra İranın ovaxtkı Xarici işlər naziri Vilayətinin bəyanat verib: "Biz Azərbaycan daxil heç bir ölkənin Rusyadan ayrılmağını istəmirik", - deməsi, 44 günlük Vətən müharibəsində Azərbaycan ordusunun cənub əməliyyatlarına maneə yaratması, ölkədaxili mətbuatda Azərbaycan əsgərlərinin "terrorçu" adlandırılması, ölkəsini deyil, azərbaycanmərkəzli deyil, iranmərkəzli düşünən "gözlər" ordusu formalaşdırması, Azərbaycanda konstitusional quruluşu dəyişməyə çağıran, ölkə başçısısını təhqir edən milli dönüklərə himayədarlıq etməsi - bütün bunlar hansı qonşu ilə XX əsrin sonları, XXI əsrin əvvəlini bölüşdüyümüzü göstərir....