«ЛЕЗГИ РУШ» ХАЛКЬДИН МАНИДИН ГАФАР

КВЕЗ ЧИДАНИ?

«ЛЕЗГИ РУШ» ХАЛКЬДИН МАНИДИН ГАФАР

Асеф Мегьман зи рик1 алай шаир-композитор тир. Чи хизандин ч1ехи дуст хьайи и умун къилихрин къени инсанди гъиле къелем авай вирибурухъ галаз дуствалдай. Зун зи уьмуьрдин юлдашдихъ галаз са шумудра Магьачкъалада адан к1вале мугьманвиле хьанай. Вичин кайвани Сариядихъ галаз санал ада авур верц1и ихтилатар садрани зи рик1елай алатдач. За жуван «Рагъдан» повестни гафарни макьам Асеф Мегьмананбур тир, Дуьрия Регьимовади лугьузвай «Аквада» манидин таъсирдик кваз кхьенай. 

Чи халкьдин дегь макьам тир «Лезгид рушаз» шаирди кхьенвай ч1аларикай иллаки хуш къведай заз: 

Асеф Мегьман:

ЛЕЗГИ РУШ

Я лезги руш, лагь вуна заз,

Чинал алай хал вид яни?

Чинал алай хал хуьзавай,

Назназидин шал вид яни?

Садра гьа манидин таъсирдик кваз за са незире кхьена Асеф Мегьманаз къалурайла адак хъвер акатнай. Вичин саягъда «аферин ваз, лезги руш!» лагьанай. Гуьгъуьнлай за и шиир жуван 1997-йисуз чапдай акъатай «Къарагъ дуьнья, лезгинкадал кьуьлериз» ктабдик (чин 235), мани лагьайт1а жува регьбервал гузвай «Сувар» ансамблдин репертуардик кутурла заз шаирди баркалла лагьанай. 

Гьа шиир за квев агакьарзава, хайибур!

Седакъет Керимова:

ЛЕЗГИ РУШ

Я лезги руш, лагь вуна заз,

Вавай рикI зав гуз жедани?

“Ваъ” лугьумир икьван хъел кваз,

Лагь, зун ви цIук куз жедани?

Я лезги руш, лагь вуна заз,

Вавай зи рикI хаз жедани?

КIанидан тIвар мецел алаз,

Чарадан гъил кьаз жедани?

Я лезги руш, лагь вуна заз,

Икьван иер наз жедани?

Лацу лифрен дамахар гваз,

Вун зи кIвале свас жедани?